KOCHUAM THUGIN
Thumapui
India gam Presbyterian Kochuam chun (Apostle thuginte, Nicea thuginte, Wast Minster thugin leh Wales gam Presbyterian Kochuam thuginte chu Pathian thu hilchetna pha tawk a ngai in, Kochuam te a ding leh Pathian thuzilna mun ate zilsak tak hi a pawm det chungin), a nuai ah thugin puandawna thute hi a Pastorte, a Probationary Pastorte, Upate leh Kochuam ah dan zokim ten a vawpdet dingun a pawm ahi.
Thugin – I
Thuthung lui leh Thuthung thak bute hi Pathian thu ahin, ziate bep hi ginna leh thil hi tena diklo theilo ahi.
Thugin – II
Pathian Pakhat bep a um a, Ama bep chu biak ding ahi. Ama chu Thagau, Ama ah um jiang, muntin ah um, Thagau dang zosia leh thil dang zosia lak a chuam ahi. A mizia ate, apilna ate, athilhitheinate, athianthona ate, dikna ate, phatna ate, thutakna ate leh hepina ate tawptik neilo, kumtuangmi, danglam ngailo ahi.
Thugin – III
Pathian a chun mihing Pathum, Pa leh Chapa leh Thagau Thiangtho a um a, apathum ua hin Pathian pakhat ahiu. Hina kibang thilhitheina leh lopina ah kibang ahiu.
Thugin – IV
Lei leh van leh asunga thil um zosia siamtu Pathian chun mihing hi hiatna, dikna leh thianthona ah Ama kipatpi in pawsal leh numai in asiam ahi. Mi zosia hi bul kibang leh sungkuan khat a unau gual a kijawm khawm chiat ihiu.
Thugin –V
Mihing chun amau nawp thu ngai in Pathian dan abawt siau a, thiamlona leh siatna achun akipuk lut tau ahi. Zia thiamlona leh siatna leh gitlo gawtna apat chu amau hukdawk ding leh Kumtuang hinna pe dingin hepina tawptik neilo Pathian chun, a kumtuang chapa neisun Lal Jesu Khrista chu Khawvel ah ahun sawl a, Ama jal bep achun mihingte hi hukdam in a umthei ahi. Zia Kumtuang chapa chu mihing taka hung hia, mihing pakhat mizia pani nei, Pathian tak leh mihing tak ahi kumkhua ta hi. Thagau Thiangtho thilhitheina zal in nungak thiangtho Mari chun avawp a, ahing a, maleh gitlona aneipuai. Migilote adingin Pathian dan chu a zawm bukim a, Pathian in dikna aphut chu mualsua ding leh mihingte Pathian tawk kilem sak dingin, kithawina tak leh bukim adingin akilan a, kross ah athi, vui in a um a, nithum nin mithi lak apat atho kit tai. Pathian changlam in achiato a, zia kipat chun amite adingin adawt piak zinga, zia kipat mithite kaitho ding leh khawvel vaihawm dingin hung kit ding ahi.
Thugin – VI
Thagau Thiangtho, Pa leh Chapa apat hung pawt chun mihingte chu hukdamna changtu ah siam a, agitlo ziau leh chunggik ziateu ahiatsak ahi. Khrista hiatna lam ah a lunggil teu a hivak a, a dawitelnateu chawktho in, Jesu Khrista chu a lalpau leh hukdampa a pawm dingah angek in, pawmthei dingin apanpi a, amau ah dikna ga zosia asem dawk sek hi.
Thugin – VII
Pathian in Khrista achun mizosia kiangin hukdamna bukim chu athawm in apia, agitloteu simding leh Lal Jesu Khrista chu a hukdampau adinga ging ding ate, Ama entawn a, Pathian dawigual tak a kingai tawm leh thiangtho tak a hing dingte in thu apia ahi. Khrista chu ging a athu zawmtute chu hukdam hintin, gitlo ngaidamnate, thiam chansaknate, Pathian cha hinate, Thagau Thiangtho chenpinate ziak a thianthonate, kumtuang lopinate chang innau. Gingtute chun tu damsung inle hukdam hi kihiatchianna kipak umtak chu achangthei ui. Thagau Thiangtho chun hepina na asepna ah, Thute, Sakramentte, Pauchapnate hi matchak in amang deu bik sek ahi.
Thugin – VIII
Khrista phudaw Sakramen te chu Baptisma leh lalpa anthian te hi ahi. Baptisma chu Pa leh Chapa leh Thagau Thiangtho min a tui a sil hi ahi. Zia hi Khrista tawh ikizawp nateu, Thagau Thiangtho zal ah pianthakna leh sukhinna teptena leh namdetna ahin, Lalpa kianga ikilatnau thilhi ahikit hi. A gitloteu sim a, Khrista chu a hukdampa dinga ginga puangtute leh achateu chansak ding ahi.
Lalpa Anthiang chu Khrista thina hiatzingna dinga vaithum leh uain nek leh dawn khawm hi ahin, gingtute Khrista thina ziak a lawkna achan uh teptena leh namdetna ahi. Ama mite chun ama leh akilatna apawm danteu, alawkpi danteu, anasem ding akipiak zel nateu, ama apawlnau leh midangte tawh akipawl nateu etsakna dingin ahungkit masangsia chu anekkhawm sek ding uh ahi. Sakramen lawknate chu Khrista malsawmna ziak leh ginna ah ne leh dawnte chunga thagau in na asep ziak a hung um ahi.
Thugin – IX
Gingtu zosia hiding chu Kochuam kipawl khawmna ah pante, Khrista Sakramen leh athil zek dang vawp phat te, adan zawpte, pauchap zelte, Lalpa ni chan thiangtho te, Ama be khawm ding a kikhawpte, A thugen gun tak a ngaithak te, Pathian malsawmna dawn gual tak ua kipak tak a piakkit te, amau lak leh mizosia lak a Khrista nunchan gual suklatte, Khawvel zosia khrista gam sulian dinga panlak te, lopi tak ah ahung kit na ding hun ngakte hi ahi.
Thugin – X
Ninung ate chun mithite chu kaithaw in um intin uh, mizosia Khrista vaihawmna chutpha ma ah kilang intin uh, zia damsunga athil hiphat leh phatlo dungzuiin vaihawm piak hinnau. Ginglote leh migilo chun thiamlo chang in agitlo uh gawtna tuak intin uh, Khrista ginga, athu zawmtute vang chu alang changa thiam chansak a um intin uh, lopina ah lawplut in um tan nau.
